პარლამენტში ახალი სამთავრობო პროგრამის თავდაცვის ნაწილის წარდგენის შემდეგ, საქართველოს თავდაცვის მინისტრობის კანდიდატმა ირაკლი ღარიბაშვილმა დეპუტატების კითხვებს უპასუხა. ერთ-ერთი კითხვა შეეხებოდა დაჭრილ-დაშავებული სამხედრო მოსამსახურეებისათვის თავდაცვის უწყებაში არსებულ პროექტებს.

ირაკლი ღარიბაშვილმა აღნიშნა, რომ დაშავებულ სამხედრო მოსამსახურეებსა და მათი ოჯახის წევრებზე ზრუნვა სახელმწიფოს ვალდებულებაა. მისი განმარტებით, წელს დაჭრილ-დაშავებულ სამხედრო მოსამსახურეებს 200-დან 800 ლარამდე სახელფასო დანამატი დაენიშნათ.

თავდაცვის მინისტრობის კანდიდატმა ახლადშემუშავებული ტრანზიციის პროგრამა გამოყო, რომელიც გრძელვადიან სამკურნალო შვებულებაში მყოფი სამხედროების აქტიურ სამხედრო სამსახურში დაბრუნებას ან სამოქალაქო ცხოვრებაში გადასვლის მხარდაჭერას ისახავს მიზნად. გარდა ამისა, მომავალი წლიდან რეაბილიტაციისა და ადაპტაციის ახალი პროგრამა დაიწყება.

ირაკლი ღარიბაშვილის განცხადებით, დაშავებული სამხედროებისთვის საჭირო სამედიცინო მომსახურებას თავდაცვის უწყება სრულად უზრუნველყოფს.

თავდაცვის მინისტრობის კანდიდატმა ამერიკელი პარტნიორების მხარდაჭერით გახსნილი მარო მაყაშვილის სახელობის სარეაბილიტაციო ცენტრის შესახებაც ისაუბრა.

მისი განცხადებით, რეგიონში უპრეცედენტო სარეაბილიტაციო ცენტრი დაჭრილი სამხედროების რესოციალიზაციასა და რეაბილიტაციას ხელს შეუწყობს. მინისტრისვე თქმით, ამავე მიზნით, დაშავებული სამხედრო მოსამსახურეები სხვადასხვა სპორტულ ღონისძიებაში მონაწილეობენ.

მან მაგალითად დაასახელა წელს ამერიკაში გამართულ სპორტულ შეჯიბრებაში ქართველი დაჭრილი სამხედროების მონაწილეობა და სხვადასხვა სახეობაში მოპოვებული 41 მედალი. მინისტრობის კანდიდატმა მზადყოფნა გამოთქვა „დაჭრილ მებრძოლთა თანადგომის ფონდთან“ თანამშრომლობის კუთხით.

მისი განცხადებით, ქართველ მებრძოლებზე ზრუნვა სოციალური პასუხისმგებლობაა და კერძო და სახელმწიფო სექტორის ნაყოფიერი თანამშრომლობის საუკეთესო მაგალითია.

ავტორი: NS (სტატია დაფინანსებულია),

სოციალური ქსელები

ელექტროენერგიის მიწოდება ნაწილობრივ აღუდგა დიდუბის, ვაკის, მთაწმინდისა და კრწანისის რაიონებს, ასევე ქუთაისის, ჭიათურის, საჩხერის, ონისა და ამბროლაურის ნაწილს

სახელმწიფო ელექტროსისტემის ინფორმაციით, ქვეყნის მასშტაბით ელექტროენერგია ავარიულად გაითიშა და მიწოდება ეტაპობრივად აღდგება

EU-ის სანქციების 21-ე პაკეტში ყულევის ქარხანა და ქართული კრიპტოპლატფორმებიც მოხვდა

ფედოროვი ვიცე-პრემიერობაზე უარს ამბობს და თავდაცვის სამინისტროში დაბრუნებას ითხოვს