ვახტანგ გომელაურმა ანაკლიაში ახალი სახანძრო-სამაშველო შენობა გახსნა

2020-10-28 10:38:06, 430 ნახვა

საზოგადოება

შინაგან საქმეთა მინისტრმა, ვახტანგ გომელაურმა ანაკლიაში ევროპული სტანდარტების ახალი სახანძრო-სამაშველო შენობა გახსნა.

ღონისძიებას ესწრებოდნენ შინაგან საქმეთა მინისტრის მოადგილეები - იოსებ ჭელიძე და გიორგი ბუთხუზი, ასევე, საგანგებო სიტუაციების მართვის სამსახურის უფროსი - თემურ მღებრიშვილი და სახანძრო-სამაშველო დეპარტამენტის წარმომადგენლები.

ანაკლიას ახალი, ევროპული სტანდარტების შესაბამისი, თანამედროვე სახანძრო-სამაშველო შენობა მოემსახურება. სამსართულიანი შენობის არქიტექტურა სრულად აკმაყოფილებს რეგიონის მოთხოვნილებებს და მასში ინტეგრირებულია როგორც სახანძრო-სამაშველო, ასევე, წყალზე სამაშველო ფუნქციები. აღნიშნულ განყოფილებაში იმუშავებს 30 მეხანძრე-მაშველი, რომლებსაც პროფესიული საქმიანობის შესასრულებლად ყველა პირობა აქვთ შექმნილი.

ამ დრომდე, ანაკლიაში სახანძრო-სამაშველო დანაყოფი არ იყო. შენობის გახსნასთან ერთად შეიქმნა და ამოქმედდება ახალი სახანძრო-სამაშველო განყოფილება, რაც გაზრდის სტიქიაზე რეაგირების ეფექტიანობას.

ანაკლიაში, ასევე, განთავსდება მყვინთავთა ჯგუფი. 2020 წლის სექტემბერში ჩატარებული რეფორმის შედეგად შეიქმნა მყვინთავთა დასავლეთ საქართველოს განყოფილება, რამაც შესაძლებელი გახადა ანაკლიაში მყვინთავ მაშველთა დანაყოფის ჩამოყალიბება. ამავე რეფორმის ფარგლებში,შინაგან საქმეთა მინისტრის - ვახტანგ გომელაურის გადაწყვეტილებით, მყვინთავების ანაზღაურება 100%-ით გაიზარდა.

ახალ შენობაში თანამშრომლებისთვის მოწყობილია სამუშაო, სასწავლო და საძინებელი ოთახები, ასევე, სპორტული დარბაზი და სამზარეულო. შენობაში გათვალისწინებულია სპეციალური სადგომი ორი სახანძრო და ერთი სამაშველო ავტომანქანისთვის.

2012–2020 წლებში აშენდა საგანგებო სიტუაციების მართვის სამსახურის ახალი შენობები: ამბროლაურში, ყაზბეგში, ბათუმში, რუსთავში, ზუგდიდში, სიღნაღსა და ბორჯომში. სამშენებლო სამუშაოები მიმდინარეობს და სრულდება: ჩხოროწყუში, წალენჯიხაში, მარტვილში, ჩოხატაურსა და აბასთუმანში.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),