საქართველოსა და ლიტვის იუსტიციის მინისტრებს შორის შეხვედრა დღეს ვილნიუსში, ლიტვის იუსტიციის სამინისტროში გაიმართა.

თეა წულუკიანმა და იუზას ბერნატონისმა ასოცირების ხელშეკრულებით ნაკისრი ვალდებულებების შესრულებისა და ვიზალიბერალიზაციის სამოქმედო გეგმით გათვალისწინებული რეფორმები განიხილეს.

ლიტვის იუსტიციის მინისტრის განცხადებით, საქართველოსა და ლიტვის იუსტიციის სამინისტროებს წამყვანი როლი აქვთ ევროინტეგრაციის პროცესისთვის აუცილებელი რეფორმების გატარებაში.

„თქვენთვის, ალბათ, საინტერესოა, როგორი გზა გავიარეთ ევროკავშირის წევრობამდე 2004 წელს. მე და ჩემი სამინისტრო მზად ვართ, ეს გზა ახლა თქვენთან ერთად გავიაროთ და თქვენ გვერდით ვიყოთ მანამ, სანამ ევროკავშირის წევრები არ გახდებით“, − განაცხადა ბერნატონისმა.

მისი თქმით, გარდა სხვა ტექნიკური თუ საკონსულტაციო ხასიათის დახმარებისა, ლიტვა საქართველოს იმ კონვენციებთან მისაერთებლად მიიწვევს, რომელთაც ჩვენი ქვეყანა ჯერ არ მიერთებია.

„ჩვენთვის ძალიან მნიშვნელოვანია საქართველოს წარმატება და ამ გზაზე თქვენ გვერდით გვიგულეთ“, − აღნიშნა ლიტვის იუსტიციის მინისტრმა.

თეა წულუკიანის განცხადებით, განსაკუთრებით საჭირო პროცესი ახლა იუსტიციის სამინისტროს ევროპის სამართლის დეპარტამენტში მიმდინარეობს, სადაც ლიტველი კოლეგების დახმარება მნიშვნელოვანი იქნება.

„ვიზალიბერალიზაციის პროცესის წარმატებით დასრულება დღეს საქართველოსთვის ძალიან მნიშვნელოვანია. ხაზგასმით შემიძლია, გითხრათ, რომ ტექნიკურ დონეზე და რეფორმების კუთხით ყველაფერი შესრულებულია, ახლა ველოდებით ევროკავშირის პოლიტიკურ გადაწყვეტილებას“, − განაცხადა თეა წულუკიანმა.

საქართველოს იუსტიციის მინისტრი ლიტველი კოლეგის მიწვევით ვილნიუსში იმყოფება. თეა წულუკიანმა მაღალი დონის შეხვედრები უკვე გამართა ლიტვის პრემიერ-მინისტრსა და საგარეო საქმეთა მინისტრთან. დაგეგმილია შეხვედრა ლიტვის სეიმის თავმჯდომარესთან, მის მოადგილესა და სხვა მაღალი რანგის თანამდებობის პირებთან.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ტრამპის ადმინისტრაციამ განაცხადა, რომ რუსეთის წინააღმდეგ სანქციები რამდენიმე ქვეყნის მოთხოვნის საფუძველზე შეამსუბუქა

ტრამპმა შეადგინა ნატოს „ურჩი“ ქვეყნების სია, რომლებიც ვაშინგტონის სურვილით, დაისჯებიან

საქართველო „ღია მმართველობის პარტნიორობიდან “ (OGP) გარიცხეს

გავარმიას ინფორმაციით, ბერა ივანიშვილის და კახი კალაძის სამეგობროს ჩხუბის შემდეგ, ივანიშვილის მეგობრები სუს-მა დააკავა